بعد نفي الجيش امتلاك صيدليات «19011».. عمرو أديب: دي ناس عندها حدود وإرهاب

علق الإعلامي عمرو أديب، على إصدار المتحدث باسم القوات المسلحة بيان ينفي فيه امتلاك الجيش مجموعية صيدليات «19011»، قائلًا: «كل شوية شائعات، دي مؤسسة لجهة سيادية أو خاصة بالجيش، والقوات المسلحة مكنش عندها أي غضاضة أو مشكلة وطلعت تقول إن الصيدليات مش بتاعتها».

وأضاف خلال تقديمه برنامجه «الحكاية»، المذاع عبر فضائية «إم بي سي مصر»، مساء أمس الاثنين، «في ناس تقعد تقول الجيش واخد كل حاجة، والقوات المسلحة مش فاضية كل يوم للرد، لا والله أصل مشروع السيارات أو الصيدليات أو مشروع الجبنة البراميلي مش تبعنا، دول ناس عندهم حدود وإرهاب، ولكن القوات المسلحة اضطرت للخروج ببيان تنفي فيه امتلاك (19011)، وهي من أكبر الصيدليات الموجودة حاليا».

وأوضح أن هناك مشكلة مع هذه الصيدليات بسبب اسمها «19011»، ولكنه لا يرى أزمة فيه، مضيفًا: «هي اختارت اسمها نفس الرقم عشان الناس تفتكرها، هتفرق إيه عن صيدليات (رشدي) أو (العزبي)، ومشروعات القوات المسلحة واضحة وباينة، ولما بتدخل مشروع بتعلن عنه، ومفيش متحدث عسكري في أي دولة في العالم بيصدر بيان (الصيدلية دي مش بتاعتي)».

وتابع: «مصر ما بقاش فيها أسرار، وما بقاش في سر ده مملوك لمين إيه حكايته هيتعرف بأي وسيلة، ماتخليش حد يستغلك ويقولك حاجة تانية، ده المطلوب أن يحصل نوع من الشيطنة وأن الجهاز ده بيتعامل مع المصريين كلهم ونشر شائعات».